Merartryppi á fjórða vetri eru komin í hús. Tryppin voru gerð bandvön í sumar og seinnipart sumars voru þau gerð reiðfær. Þau líta nokkuð vel út og hlakkar Vakurstaðabændum til að sjá hvernig gengur með þær í vetur. Gunnar Guðmundsson var að ljúka við að járna tryppin í gær þegar þessar myndir voru teknar. Rauða faxprúða hryssan sem Gunni stendur við er undan Leikni og Hyllingu frá Vakurstöðum sem Lena Zielensky tamdi, sýndi og keppti á á Ístölti 2002 sem þær sigruðu.

Á Vakurstöðum er byrjað að gefa út útigangshrossunum. Folaldsmerar eru hafðar sér og tryppin í uppvexti sér en í  febrúar eru folöldin tekin á hús og fóðruð. Þeim hrossum sem eru úti er gefið tvisvar til þrisvar í viku og hafa aðgang að rennandi vatni, salti og góðu skjóli. Nauðsynlegt er fyrir hrossin að komast í gott skjól þegar hríð eða slagveður er úti. Það er fátt betra en að vita af hrossunum í góðu skjóli þegar veður eru válind eins og stundum vill verða hér fyrir austan.

Nú fer Meistaradeildin að hefjast og stjórnendur liðanna búnir að velja knapa sína fyrir slaginn. Sex lið munu keppa sín á milli í fjórgangi, fimmgangi, tölti, smala, gæðingafimi, skeiði, gæðingaskeiði, flugskeiði og slaktaumatölti T2. Liðstjóri Málningar hf, Þorvaldur Árni Þorvaldsson, valdi fyrst í liðið Atla Guðmundsson sem sigraði Meistaradeildina síðast en lið Málningar skipar að þessu sinni auk Atla og Þorvaldar, Valdimar Bergstað og Sævar Örn Sigurvinsson. Þannig munu sex lið með fjórum knöpum berjast um titilinn í vetur. 

Leiknir hefur verið í sundþjálfun hjá Helga Leif og Örnu sem reka þjálfunarmiðstöðina Faxahesta í Víðidalnum í vikutíma. Skemmst frá að segja kemur á óvart árangurinn á svo stuttum tíma sem hann hefur verið í þessari þjálfun.

 

Hann hefur synt í fimm skipti og þegar Leiknir var myndaður í dag var það í sjötta skiptið. Þjálfunin byggist upp á því að styrkja og mýkja hestinn og fylgst er með púlsi hans eftir hvert sund. Efri mörk Leiknis voru upp undir 200 slög á mínútu þegar hann kom fyrst fyrir viku og var látinn synda tvær ferðir.