|
fimmtudagur 30. október 2008 |
 Klárhesturinn og snillingurinn Glymur frá Sauðárkróki er til sölu hjá Hirti Bergstað og fjölskyldu.
Glymur frá Sauðárkróki er úr ræktun Sveins Guðmundssonar á Sauðárkróki
og því er það kjörið tækifæri fyrir ræktendur sem líta til
Sauðárkrókslinunnar að gefa Glymi gaum. Móðir Glyms er Gnótt frá
Sauðárkróki sem er afkvæmi Hrefnu frá Sauðárkróki, dóttir Sörla og
Flugu frá Sauðárkróki.
Faðir Glyms er Hrafnssonurinn Logi frá Skarði sem hestamenn þekkja
vel en hann var seldur til útlanda fyrir nokkrum árum. Mette Mannseth
sýndi Glym á LM2006 og síðan tók Daníel Jónsson við taumunum og sýndi
hann á landsmótinu síðastliðið sumar. Þar hlaut hann 8.38 fyrir
hæfileikaþáttinn og 8.39 í aðaleinkunn. Fimm níur fyrir tölt, brokk,
stökk, vilja og geðslag og fegurð í reið. Sköpulag er gott, þar er hann
með 8.40 í einkunn. 8.0 fyrir höfuð, 9.0 fyrir háls, herðar og bóga og
samræmi. Fyrir fótagerð er hann hins vegar með 7.5.
Glymur er bróðir Galsa frá Sauðárkróki sem var sæmdur heiðursverðlaunum fyrir afkvæmi árið 2004. Kaupverðið fæst ekki gefið upp.
Mette Mannseth og Glymur frá Sauðárkróki á landsmóti hestamanna á Vindheimamelum 2006.Mynd/Axel Jón.
|
