Vakurstaðir - Vakurstaðir

Hjónin Valdimar Bergstað og Halldóra Baldvinsdóttir sitja við gömlu tóftirnar á Vakurstöðum. Myndin að neðan. Séð heim á Vakurstaði.

Í jarðabók Árna Magnússonar og Páls Vídalíns sem skráð var í árið 1708 um Holtamannahrepp er Vakurstöðum lýst þannig: Vakurstaðir heita í Skammbeinsstaðalandi nú sem stendur. Hefur auðsýnilega bær verið og sér glöggt fyrir túni, girðingum og bæjarhúsarústum, merkigarði milli Skammbeinsstaða og þessara Vakurstaða, svo og heitir Vakurstaðaengi, er þeirri jörð skal fylgt hafa.

Enginn man að þessi jörð byggð hafi verið og meinast hún í tvö hundruð ár eður þar um í eði verið hafa. Kynni eins og til forna, aftur að byggjast, því ekkert grandar jörðunni en þetta lenti í sama stað því svo yrði Skammbeinsstaðir smærri jörð og leiguminni hverri nú fylgir þetta Vakurstaðaland allt. Þess má geta að elsta kunna heimldin um Vakurstaði er máldagi Oddakirkju frá 1270.

Hrossarækt á Vakurstöðum

Greinin birtist í 2. tbl tímaritsins HESTA 2003.
Höfundur: Jens Einarsson.

Leiknir frá Vakurstöðum vakti mikla athygli á Stórsýningu hestamanna í Reiðhöllinni í Víðidal í vor. Framganga þessa fjögurra vetra stóðhests heillaði sýningargesti upp úr skónum, ný stjarna var komin fram! Dagana á eftir sýninguna máttu eigendur hans hafa sig alla við að svara fyrirspurnum og taka niður pantanir fyrir hryssur. En hvaðan er þessi efnilegi foli, undan hvaða hrossum er hann og hver ræktaði hann?

Fjölskyldan Bergstað
Leiknir er kenndur við Vakurstaði í Holtum sem er sex ára gamalt nýbýli úr landi Skammbeinsstaða og er nefnt eftir fornu eyðibýli sem er í landi þess. Eigandi Leiknis er Halldóra Baldvinsdóttir í Reykjavík. Hún er kona Valdimars Bergstað, sem jafnan er kenndur við fyrirtæki sitt, Málningu hf. Sonur þeirra, Hjörtur Bergstað, er kunnur hestamaður og sonur hans, Valdimar Bergstað yngri, er efnis reiðmaður, hefur m.a. vakið athygli fyrir góðan árangur á skeiðhestum þótt hann sé aðeins 13 ára.

Leiknir, undan Safír frá Viðvík, er kominn í fyrstu verðlaun, með 8,08 í aðaleinkunn. Það skal tekið fram að þótt afkvæmi Gæfu hafi ekki slegið í gegn á sýningum ennþá eru til undan henni mjög góð reiðhross, t.a.m. hestur undan Svarti frá Unalæk sem er rúmur og hágengur töltari. En það er ekki nóg að hafa góðan efnivið, það verður að vinna rétt úr honum. Óhætt er að segja að Vakurstaðafólkið hafi haft heppnina með sér í vetur hvað það varðar. Í vetur var tamin fjögurra vetra hryssa undan henni og Safír frá Viðvík og spáir Hjörtur vel fyrir henni.